الحلم... / يعقوب احمد يعقوب

موضوع: الحلم... / يعقوب احمد يعقوب 22/1/2008, 20:33

الحلم...
الحلم...
الحلم...

كلمات :يعقوب احمد يعقوب
الحان : نبيل عازر
غناء: جوقة سنابل كفر مندا (فلسطيـــــــن)

الحُلـــم

من حقنا نحلم
من حقنا نفرح
من حقنا يبقى
في الكون لنا مطرح
من حقنا نضحك
من حقنا نبكي
من حقنا نسكت
من حقنا نحكي
الدنيا من ملكك
الدنيا من ملكي
انت وانا عايشين
في حبها شركه
***
من حقنا نرسم ميلاد ضحكتنا
من حقنا نكتب كلمات فرحتنا
من حقنا نزرع قمحات لقمتنا
ومن حقنا نغزل خيطان كنزتنا
الحلم ما هو صعب
الصعب لو نقطع
من النص حلمتنا
***

من حقنا يا ناس نرفع شوي الراس
ويكبر بنا الاحساس بانا مثل الناس
ونمدهاللشمس ايدين ضحكتنا
الظلمه ما تدوم
وللظلم جاي يوم
تمحاه ارادتنا
***
ممكن نحلم حلم زغير
ونحبه ويكبراكثر
ويمكن نحلم حلم كبير
عجناحو نسافرونطير
لكل الدنيا واكتر
المهم الحلم يصير
امانينا الحلوه يصور
***
وما دام بصدرك قلب
احضن اماني قلبك
وما دام غيرك بتحب
بتلاقي الدنيا تحبك
خلي عندك امل وقلب
ما بتسوى من غير قلبك
قلبك شمعه تضوي الدرب
تا تشوف الخطوه بدربك
***

احلم احلم وين ما تكون
لا تتنازل عن حلمك
الحلم نور العيون
لو ضميتو بيضمك
***
الشمس لكل الناس
والهوا وعطر الزهره
والامل هوي الاساس
والشجره اصلا بذره
واللي ما تحققش اليوم
لازم يتحقق بكره
***
يمكن يمنعوا عنك
كلشي الا انك تحلم
ويمكن يعرفوا عنك
كلشي الا شو بتحلم
احلم احلم ما اتخفش
وامشي ابدا ما تقفش
انت حلمك ...حلمك انت
من غير حلمك ما تكنش
***

الحلم هو آخر سلاحك
اطلقو عالعتم
تا يطلع صباحك
وارفع عيونك للسما
للشمس
للفجر البعيد
واضغط على جرحك
وقلو من جديد
الفجر جاي
بكره جاي
شي اكيد
***
واوعى الدمع
يطفي ضياء العين
ما كان بالصدفه
للعمله في وجهين
لما تشوف الشر
اسأل المحبه وين
والمر لولا المر
الحلو ييجي منين
***

وبالدرب لو تسقط
ما عيب بسقوطك
وقف على رمشك
ولا ينخرس صوتك
واصرخ بوجه الظلم
ولا ترضى بموتك
نص النجاح انك
تتوقع سقوطك
***
من حقنا نحلم
والحلم ما هو صعب
ييجي برمشة عين
ييجي بلهفة قلب
الحلم كلو دين
وبيندفع لما
تسقط بنص الدرب
***

وما دام قلبك ينبض
ما دام فيك احساس
لا ترضى منو يبغض
وعيش عشان الناس
وبكل القوه اركض
بشعلة الاحساس
وصلها للي بعدك
ما دام فيك انفاس
الحب
انك
تعطي وتحب
كل الناس
***

السلام عليكم

اقتباس :: وما دام قلبك ينبض
ما دام فيك احساس
لا ترضى منو يبغض
وعيش عشان الناس
وبكل القوه اركض
بشعلة الاحساس
وصلها للي بعدك
ما دام فيك انفاس
الحب
انك
تعطي وتحب
كل الناس

كلمات حلوة اوي وقوية
لكـ كل الاحترام

دمتم برعاية الرحمن